.
مساء النور علابالي جرنان بصح اقراوه ياك باطل:D
اولا اذا لقيتي نفسك عندك خمول فشل رغبة في البكاء والانطواء تعب ونفسك تكون وكانها في سبات راح يؤثر هذا على نشاطك راح تكون حركتك ثقيلة ونفسيتك متعوبة وكارهة كلشي
كيفاش نبرى ؟ كيفاش نرتاح ؟ تبعي خالتك crono:D
اولا الشدة في الله سبحانه كلما قربت لله كلما ارتاحت نفسيتك كلما وثقت في الله كلما زاد ايمانك خلي يقينك ان الله كتب لك نصيب من الدنيا كما يكون تقبليه وعيشيه واحمدي الله عليه .
القرآن هو دواك اقراي وردك يوميا وماتقطعيش كتاب الله وماتهجريهش راح يهجرك في قبرك .
الصلاة ثم الصلاة ماراكي خاسرة والو يااختي الصلا ة في الوقت ضروري تنتظريها توضاي واستنايها ماتعجزيش تخيلي راح تلاقي احب واحد عندك اكيد راح تتجهزي وتكوني في الموعد اذن ماذا لو كان اللقاء مع الله ؟
ماتقارنيش روحك مع حتى واحد لانو راح تذلي روحك كل واحدة ورزقها وكل واحدة وهمها ومكانش اللي تشاركك خصوصياتها يعني ماتخزريش للسما عينيك يتعبو ورقبتك تتعوج شوفي اللي تحتك لانو مخلوقين من تراب ورايحين للتراب .
لازم تنحي من قاموسك كل طاقة سلبية راح تخليك في اكتئاب:
ناس تعرفيهم يشكو ويبكو ويندبو في كل مرة لاالحمد لله لاشي .
ناس نكدية و قرعاجة وتدي الهدرة وتجيب فتانة نمامة تحب الغيبة و الحكايات تاع الناس .
ناس تعرفك في الشدة تجيك وتبكيلك وفي الرخاء حسها مقطوع وتنساك وتبعد عنك .
يتنحااااو قااااع
خلي لسانك حلو هاااااا اختي بزاف لسانهم مر علقم علاش يعني انت زعمة مسيطرة ولا دايرة مزية في الناس بزاف لسانهم حار اختي تفكري الكلمة الطيبة صدقة ماتجرحيش الناس ومن بعد تقولي سمحولي انا صريحة لالا ماشي صراحة وقاحة هذيك تقدري تكوني صريحة دون تجريح كلشي يروح غير العيب ماشي مليح
الغبار في بيتك يسبب طاقة سلبية كبيرة ضروري تتخلصي منو وتعطري البيت دوما لكن التعطير بعد التنظيف و تغيير الدراوات وغلافات المخايد والستائر
الخردة الخردة هي بحد ذاتها هردة : شوفي قانون اذا عندك الخردة في دارك عمرك ماتريحي ونفسيتك راح تتعب ارمي عليك الاثار و الاطلال حاجة ماتحتاجيهاش تتنحى حاجة تخدمي عليها وماتخدمش عليك كالالات المكسرة او صندوق قديم او قطعة اثاث قديمة او ملابس تاعك تاع دقيوس تتنحى يعني بالمختصر
يتنحاااااو قاع :D
صدقيهم او ارميهم اذا مايصلحوش علاه تخدمي عليهم تبقاي تمسحيلهم الغبار او تطويهم الخ .خلي الماكسيموم في دارك تبقى مفروزة تذكري رانا في 2020 وعندك الخردة ؟! لا ياحليش😂😂 افرزي واحتفظي باقل شيء ممكن نقصي عليك الضغط انا مانحبش كوزينة متحف نحب البوطاجي فارغ يولول نحب خزانة فيها واش نلبس بس كي تشري كاس صدقي كاس قديم كي تكسبي قمجة نقصي قمجة وهكذا .
الاخبار المحزنة اللي تلقايها بالفيس او اليوتوب او التلفاز تفاداي قراءتها ومتابعتها راح تفشلك فشل رهيب وماتنقليش الخبر اللي يغم القلب حذاري انقلي كل ماهو خير عوض مانقولو قتل سرقة اغتصاب انفجار الخ من المفروض ننقلو الاخبار الطيبة صدق احسن تزوج ولد الخ .
الابتسامة عندها علاج قوي لانو راح تغذي شرايين المخ وتشعرك بالراحة والفرح معليش فوق القلب تبسمي ترتاحي ايواااه هكاك ابتسمي شفتك 😂😂😂 خلي يقولو عليك حاطاتو ابتسمي في اقصى درجات الغضب .
اما السر اللي يخلي نهارك شباب مبارك هو المنواض بكري بالذهب مشري اوووو شحال حلوة نسمة الصباح ياخياتي الهواء هذاك بين صلاة الفجر و ال 8 رووووعة روووعة اخرجي للهواء تاقة او بالكون او جنينة وشمي نسمة الصباح اعملي شهيق وزفير دخلي الهواء النقي لذاتك ترتاحي .
السبور الرياضة دواء وشفاء ماتخلوهاش ولو المشي ننصحكم ياليوغا رو وعة شحال هداتلي اعصابي ونحاتلي توتر ايام التوتر ديري اليوتوب وتبعي اليوغا تنحي الزعاف .
اذا كنت سمينة ديري ريجيم خفيف ترجع ثقتك بروحك واذا كنت العكس الشوكولا هي املك راح تكسبي وزن اذا ناقصك .
اشري اواني الطين او الفخار ماتكونش مطلية اشربي فيها الماء كولي فيها فيها شحنات ايجابية خلقنا من طين .
العبي شوي مع الاطفال ولادك او جيرانك زوري عالم البراءة يرتاح بالك اقراي قصص شوفي سنان 😂 اي ميكي قديم
اهم شيء الكنز اللي عندك بلاكي عليه به تعيشي ملكة او تعيشي مرمية الصحة صحتك صحتك صحتك صحتك صحتك اهم حاجة ايااختي الشغل يخلاص الهم يخلاص والصحة عولة تحتفظي بها تحتفظ بك تضيعيها تطفرت فيك ماتعزيش على صحتك والو كولي مليح برك خليك من القش خليك من الشباحات والمظاهر و الحطات على جال خيرة و فلانة و فلانة كولي مليح فششي جسمك وجسم ولادك نوعي في اكلك و الباقي زيادة ماتمشيش عل حساب الناس مراحش ينفعوك يندبو خلي الناس وسيلة فقط للتواصل والعيش ماتعيشيش للناس عيشي لروحك برك في رضا الله اكيد
شوفي يا اختي نصيحتي الاخيرة تفكريها وقولي قالتها crono
ربي عطاك الحياة تعيشيها مرة واحدة هذا العمر تاع ضك اللي راكي فيه راح يبقى ذكرى وتكبري وتتجلدي و يجري عليك العمر تبقاي تشوفي غير بعينيك اذن استغلي صغرك استغلي حياتك قبل مماتك راكي راح تندمي ندمة كحلاء عيشي في رضاالله اضحكي وبروفيتي من الناس اللي تحبيهم ماتضيعيش الوقت راح يموتو ونموتو قاع ويروح عليك الحال وتبقالك ندامة .
وصلتي هنا يعني قريتي المقال برافو عليك اختيى.
اي حاجة ماعندكش وحابتها خليها تجيك وحدها اذا كتبها الله جات مرحبا ماجاتش فيها خير لاه قاتلة روحك باااطل لاه تنساي واش بين يديك وتحوسي على اللي خصك .لالا اختي القناعة كنز لا يفنى حياتك تعيشيها مرة
جرنان تع الصح:D بسيف باش كملته بصح فيها فايدة كبيرة
ا.
ليست هناك تعليقات:
إرسال تعليق